सोंथि आरो मोन्दांथि

"सोंथि आरो मोन्दांथि"
                             ✍️ अजित बसुमतारी, चेन्नाइ
                             🛌
जिउनि सोंथेनाय गोसोम फैसालिखौ बोखारनायनि असिलायै
काथिआव बग्लाबनाय सेफालिनि गोरलै मोदोमजों
नों होनो फैयोना दाबो आंनि आखायाव
गोर्लै बैसागनि रोदोमफिननाय गांखं (?)

फागुना उबांङै होफैनाय जिउनि दाहायाव
आं सिमांखौ गथायफिन्नांगौ जागोन
मानोना नोरजियाजों देलायनाय सानथिफोरा
गुन सुहाबनाय दिंङाजों दावबायहालिया

दा खुसिनि जाहोनफोराबो दाहाजों बोलि जानांबाय
जोमैनि बेन्दोंआव सिमां हाथर्खिय़ा फासि होजाबाय
बिश गोनां निन नि बरिजों
मांकरनि ख'थायाव सिरियै उन्दुलांबाय सोलेरा।