नों दायनिगिरि जानो हाया-।

"नों दायनिगिरि जानो हाया-।"
                       ✍️ अजित,चेन्नाइ
खुरिया स'म
नोंजे आंनि मेगन सिगाङाव दंफैयो
बेखौनो आं सिनायरोङाखैमोन,

नोंनि बिखानि सुफोरा आंखौ हां हां सुथाबनो फैदों
आंनि उन-सिगां बायदि गाबजों साजायनानै
नोंनि गोरबोनि दाहा मेथायजों फोजाखांफैयो
आंनि बिखा जांख्रिखांङो
सोदोबफोरजों आं खाथाबना दोनजायो
गिखाङो ह'रसे बै सोदोबफोरानो मोनसे भावथिना‌ जालांआथ'(?)

नों माब्लाबा मिथिनो लुबैयोमोनना
बबे गाबजों आंदि बिखौ साजायदोंमोन
आरोबाव मिथिनो लुबैयोमोनना
आंजे बबे मेगनजों नायो
नों नुनाय नंङा जेबांखि बिजिरोब्लाबो
मानोना आं सुजुनाय सिमां आंसो
आंनि गोरबो मेगनजों नुयो

दा सोनाबनि बारजों बिरबोफानाय
गोलेर मोखांनि गोसोम मैखि दाखाया
आंनि गोरबोआव नांफैदों
बेजोंनो आं जोखोम जादों
गोसोआ जौ दान्दा बारना‌ बास्रिहैदों
आंगो देराय़ाव बयखौबो एंगारना

आंहा जेबो बुंनांगौ गैयलिया नों साजायोब्लाबो
लामा ह'न्थानि थै सोबग्रा लामा खान्दायजों
एबा ह'र गेजेरनि मोखां गैजायै सुबुंजों
आरो बेनि थाखाय नों दायनिगिरि जानो हाया।