जोंनो दायनिगिरि जाथोंसै

जोंनो दायनिगिरि जाथोंसै

                              ✍️ अजित बसुमतारी चेन्नई

लिरखोमाना दोनदों बयबो
थैसामनि खोलोमजों जारिमिन डायरियाव
थैनाय - गोमानायनि ,जामब्रिनांनाय गोरबोनि
सिरिमोनखांङै आंगो गोमाजानायनि

दुखुगोनां मशुलनि गोथां जारिमिन बायदिनो
जापाननि लितिल बय आरो फेत मेनआ
होलांनाय सेवनो रोङै गोथां जारिमिन बायदिनो
दिनैनि समाबो जोबोद गोब्राब दुखुनांथाव
बेयो जोंनि मेगन सिगाङाव
बेयो जोंनि बिलोआव -गाथोनाव
जेराव जों बयबो गोजोनै जिरायनो
दावहा मोनसे नांगासिनो दं

औ जोंनो दायनिगिरि जाथोंसै
रोजा बिमानि बायग्लिनाय बिखानि
दाय गोयै सोलेर रोहो-रोहो खामग्लिनांयनि
जिउनि आंगो गोमाजानांयनि
गोथै गथ' आखायाव लानानै गाबनांनाय बिमानि
बे दावहायाव जायानो देरहाथों
जेनदों सुबुंआनो जोबस्रांदों सुबुंआनो
नाथाय मिथिया गुबुना मानिमोन बे दावहाया

फैदों जों बयबो आर'ज गाबनि
जाय जोंखौ गावनि द'बायाव लाना
फोथैग्रा फानदायग्रा सुथुरनिफ्राइ रैखा होबोदों
जाय जोंनो गावनि होनना गसंथानो गोहो होबोदों
बिनिनो रैखाथिनि बिखौनो बिख'नायनि
गारांसेयै दिनैनिफ्राय हान्जा सुरलांनि।