गोदान मिजिंजों

गोदान मिजिंजों।
(गोबाव समनिफ्राइ आंगोथि बायनाय लोगोफोरनो)

नै लोगो..! स'मा बैसोगोरा जालांथारबाय
नोंखौ लोगो ह'मैयाबो आसि बिजौआव सानजानाय जाबाय
नोंबो गावखौ गुस्लायहोनो जोबोद मुखुब जाबाय
आंबो गावखौ सम थानायावनो नाजानांगौ सानबाय
नोंनि लामा आंनि लामा गोरोबथारलिया
थेवबो आंगो लोगोनि मोकथां बिस'म्बिफोरखौ
मोन्दांहायो दिनैनि बुब्लियाव
बेनिखायनो आं सोंनो गोसो जायो "नों दा माबोरै दं" ?

बै स'मा थारैनो मुहि गोनांमोन
बुहुमनि गोर्बोआव एरियानसनि आगान नागिरनाय
लैथोमा सिंआव मुखथाफोरजों गेलेहैनाय
जेरावबो खौसेयै, दोंसेयै आरो आगानसेयै सावगारिफोरा
आंनि जारिमिनाव लिरथि थालांबाय

बेनिखायनो आं सोंनो गोसो जायो
नोंनि गोसोआवबो गेलैफैयोना बैफोर बुब्लिया?

जायखि गोहोआनो दाजाथों सोरखि हादोंमोन
जेंसिगोनां लामाजोंबो थांखि मावफुंहादोंमोन
नाथाय बैफोर सानसे माब्लाबानो गोमालांदोंमोन
गोबां जाहोनफोरजों नोंनि आंनि आखायनिफ्राइ
बेनिखायनो दा सोंबावनो गोसो जादों
नोंखि बै जाहोनफोरखौ नेवसिनो हागोनदा..?

खौसेथियानो गोहोब्ला फैदो आंगो
गोरोबथाजों गंसे लामा सोरजिदिनि
मोनसा गोयै सोंखारिनाय गोयै लामा
जायजों गोरबोफोरा गोरोबना थाबायलांगोन खौसेयै।

✍️ अजित बसुमतारी, चेन्नाइ
       01-08-2019
ajitbasumatary.blogstar.com