नों थैलांनाय समनि खोथा-।

नों थैलांनाय समनि खोथा।

सिमांआवबो फैखादोंमोन
नों लोमजानाय देहाजों
आंखौ बुहुम गिदिं गिदिं नागिरना
खासि बिबारनि गुफुर गाथोनाव
मेंज्लिनायजों जिरायहाबना थानाय
ताबुकनि आन्दोआव,

सोलेरा ह'रसेमानि सिमांफोरजोंनो रायज्लायो
आखायफोरा दांग्रोमहरो ह'रै हाब्रांआवबो मोननो
नों हर्खाबै सिमांनिफ्राय आनज्रायलांनायाव

फोथायथिनि दावखाफोराबो गाबफैदोंमोन
सिगुनफ्रा होफैदोंमोन गोसोम सानथिनि थ'फ्ला
गोसोआ गिलिर आरो दरसि आबिरजों गाहाबलांदोंमोन
मेगनफोरा खोमसियाव आन्दायनांदोंमोन

मोकथां जाथायफोरा जिलिद जाना‌ हाबफैदोंमोन
सुदेम बाराबो जोबथा हां बोनायनि मोदोमनाय होफैदोंमोन
आस'खान्दायै एंगारलांगोननि सानबोलावरिजों खामखांदोंमोन
बेनिखायनो ग'साइनि आथिं गुदियाव नोंखौ बिदोंमोन
जेन' साखाथियाव अरायबो नोंखौ मोनबाय थायो।