फागुननि गोरलै बारजों
सिमांआव फोजाफैयो थैनाय सोलेरखौ नों
सिरियै आनज्रायलांफिनो नोजोरनिफ्राय
काथिनि सेफालिथ' नंङामोन नों!
दिनैबो गोमाना थांङाखै
आंनि मेगन आरो गोरबोनिफ्राय
नाथाय आखाय फोलावनानैबो मोनहास'हायासै
हास्थायनानैबो नुयासै नोंनि मिनिस्लुनाय
नों नुजाफैयासै गावदां अखाफोर जाना
बैसागनि दरसि हराव आंनि थाखाय।
आं एंगारबोबाय नोंनि सोहोर
नाथाय थाबोबाय आंनि दाहा
दोलोसे फिसिनाय ज'ब्रा सिमां
बिखायाव थिनाय अननाय आरो
आं होनाय रादाय
थारैनो बेफोर दाबो गोथांङै दं नोंनि आन्दोआव।
आंहा मोनबो राहा गैलिया
गोरबोनि खोथाखौ फोरमायहरनो
ऐबा नों माबोरै दं खौरां लानो
नाथाय आं नेदों नोंजे सानसे नुजाफैगोन
आंनि मेगन सिगाङाव अलंबार जानानै
नों मोसाफैगोन आंनि देंखोआव
खोमसियाव दिन्दांनाय आब्रा सानथि दमन खालामनो
गोदान गंसे स'हर लानानै।
