गोर्बो गाबनाय दाहानि बेखेवथि

गोर्बो गाबनाय दाहानि बेखेवथि"
(अनसुलि बिसि ज्योति 🔮 नो)
___-____-____-_____-____-__

सान बारलांसै - ह'र बारलांसै
नोंनि दाहागोबां आखायनि ग'हेनाजों
फारि लायै एरखांनाय
फारौ मेग'न आग'रनि हिसानाव
सोंथिनि सानबोलावरि बेरखांसै जानांगौ
ग'ले ग'ले नुजाफैनो हायैयाव दिनैबो,

आं मिथिदों नोंनि दुखुखौ
नोंनि बिखा सौखावनाय गाबनायखौ
आं मोनदांदों नोंनि गोसोनि बिनाय
बेसेदि सौखुमादों नोंनि गोरिब गोरबोखौ
बाबेनलांनाय जिग्रोद बुब्लिफोरा
खोनामोन्दों आं जेब्ला मेंनायजों जिरायो,

लायफांनि गोदान म'हरजों बोथोरनि गुस्लायनायाव
लामा नायै मेगननि नोजोरा गेमब्रुलांबाय
गोसोनि बोलोआ अ'रमाइलांबाय जानांगौ
ग'ले ग'ले द'मासि-बैसागो बाबेनलांनायाव,

सानाबो ह'र - ह'राबो सान
दिनैनि आवगायनांगौ लामाया
बेयावनो आं इउननि सिमांजों होंगो-दोंगो गेलेदों
उनफारसे गारबोनाय बुब्लिबादि
निदानाव खाफाल बुयैनो
समनि बारगलांनाय आं लुबैयामोन
नोंनो, फंबाइ - बिनानावनो थिह'रनाय स'मखौ
मानज्रं-मानज्रं नायनो गोसो गैथारा।

                 XxxxxX

AJIT BASUMATARY, Chennai